U t'aan wíinike' ku ye'esik máaxo'on, ku ts'íibtik yéetel ku yéets'tik bix in na'atiko'on yóok'ol kaab, bey xan  ku ts'áaik to'on u na'atil bixo'on. 

Jach mina'an u naakil u yutsil jump'éel nojlu'um tu'ux yaan u piktáanil t'aano'ob. Jump'éel nojlu'umil tu'ux  yaan u muuk'il yéetel u toj óolal le t'aano'obo', je'el u béeytal u nupik u juumo'ob jumpáakili'e' uti'al u meentiko'ob u ch'íijil u tuukul kajnáalilo'ob yéetel wíiniko'ob. 

Uti'al u káajbal u paklam na'atikubáaj tuláakal le t'aano'obo' k'a'ana'anchaj u yáax káajsa'al u sutt'aanil  le káastelan ti' le máasewal t'aano'obo'. Je'ex ken a wil te' meyajo'oba' su'ut u mejen tsikbalilo'ob fiisikaj, tumen k'a'abet u yutsil je'ets'el jump'éel meyajil tu'ux ku tsikbe'enta'al u na'at yéetel u tuukul máasewal t'aano'ob. Tumen jach k'a'abet u nuukbesa'al bix u yila'al yéetel bix u na'ata'al ti' le jejeláas t'aano'obo', le ba'alo'ob ku yúuchul way yóok'ol kaaba', tumen leti' u yóol u tuukulo'ob.

Le meyaj ka wilika' jóok' tu paklam meyajil u Moláayil Fiisikaj way Meejikoje', inali, yéetel u meyaj jejeláas  aj yéetel ixsutt'aano'ob ti' jejeláas t'aanilo'ob yaan way Meejikoja'. 

Wak jump'éelel le mejen tsikbalo'ob tu'ux taak in ka'ansiko'on wajayp'éel ba'al yóok'sal fiisikaj, uti'al xan in  jets'iko'on jump'éel múulan tsikbal tu'ux ku ts'a'abal u muuk'il le páajtalil yaan ti' le máaxo'ob ku t'aniko'ob máasewal t'aano'obo' yéetel ka yaanlak uláak' bix u mu'uk'a'ankuunsa'al in t'aano'on. 

Te' chan ju'unalte'a' ya'abkach wíiniko'ob tu ts'áaj u yóolo'obi'. Kin jach k'áat óoltiko'on ka a xokej yéetel  ka a yaabilt a nojlu'umil tu'ux yaan uláak' t'aano'ob ti' u'uybij yéetel ti' a kanik ba'ax u yojel le máaxo'ob t'aniko'.